睇到我地昨日outing嘅相,無去嘅朋友係唔係好羡慕呢?昨日天氣非常之好,陽光充沛,天朗氣清,能見度相當高,我地終於可以全程唔駛著雨褸,或者擔住把遮,隻腳又唔駛沾滿泥漿喇!不過,借用wa教練一句口頭蟬:"...不過就有辣有唔辣啦!"好天嘅代價,當然係要同陽光玩遊戲啦!紫外線加高溫,少d準備同體能,都會喪命!
講返我地嘅outing,我地六位學員,相約喺西貢巴士總站集合,再搭巴士往wa嘅基地!我一到步,
湯美就打量吓我嘅背囊,然後就傳出呼天搶地嘅慘叫...呀!...咩事?!原來
湯美出發前無睇到
稻草人嘅post,帶咗fullgear出場!唔係day pack嘅易嬌聞,係overnight嘅易嬌聞...!當日咁熱,孭三十幾磅背囊,都幾大穫,聽聞好似仲有臘腸添喎!全程巴士,
湯美做晒主角,製造咗好多歡樂!但歡樂背後,其實都有代價,究竟係咩?陣間再講!
我地上午九點到達wa嘅基地集合,對我嚟講,見識到基地嘅真面目,真係有d興奮,現場有好多唔同嘅裝備,分門別類咁放於兩邊,除咗我地常見嘅繩同扣之外,仲有一d攀岩嘅"架生",雖然唔知點用,但肯定係專業嘢,好有新鮮感呢!人齊之後,作一個出發前必須嘅簡報後,影咗d相,我地就向爆林嘅起點...出發!!!
由於當日我已帶住二級山合格嘅心情出現,心態上有少少放鬆(阿Sze,原諒我呀!),轉為加多一點享受嘅心態,都幾開心!沿途有傾有講,有時又俾教練突擊吓d山形地勢,好快就到達上午嘅重頭戲--爆林嘅起點了!到達現場,
朋友就叫我地試吓自己搵條路上山...吓!
...大佬!無路喎...!咪就係無路行先叫做爆囉!我地呢幾粒爆林新丁,對住幅綠色嘢,無從入手,最後由
朋友身先士卒,喺我地面前,示範吓重要嘅三級班學前課程--"爆林"!我一踏入呢幅綠色嘢,行咗五步,就已經知道,今次真係嚟料喇!起步時,兩邊嘅植物都好高,加上樹滕交加橫纏,一定要"烏"低身過,好彩我前面係高大嘅
祖名,跟住佢行過嘅軌跡,點都有d著數!向上攀升咗大約20米後,頭頂嘅植物少了,唔駛再"烏"低身行,但又即係代表對陽光嘅掩護...無咗!強勁嘅陽光,曬得全身灼熱,但好在間中有d涼風吹過,我地梗係要停一停,爽一爽啦!除咗天氣係考驗之外,崎嶇嘅"路"都令我體力快速消耗,步履有時小,有時又要大,有時仲要爬添,非常吃力!!記得行到山腰位置,唯一嘅女隊員
曉達,因為失足跣腳,跌咗落側邊,險象環生!好在有d植物頂住,無咩大礙!其實除咗
曉達,我地大家d手、面、頸,都留有不少長短"戰績"呢!由於天氣實在太熱,大家又要手腳並用咁向上推進,都用咗唔少體力,爆咗大半個山後,教練提議我地爆番去小路方向,再由小路上頂...我地撐吓撐吓,終於上到頂喇!!哈哈哈哈!!(可能得我一個係撐嘅呢!)
上到頂,陽光當然無少到啦,但都叫做有d風,通爽d,我當時體力指數都已經跌盡,多得
朋友開把遮遞俾我,好感動呢!大家休息咗一陣,準備再次起行,就喺呢個時候,孭住三十幾磅背囊嘅
湯美感到有d不適,有輕微衰竭嘅徵狀...我地咁pro(自稱),當然處理到啦...!其實係好在佢嘅情況唔算太嚴重,食返d高熱量嘅食物補充,再加飲水、撥扇、休息...一陣間,
湯美就回復過嚟,行程又可以繼續喇!但喺呢個時候,大家記唔記得上文講過嘅"代價"呢?如果...咁咁咁...事情又會唔會...咁咁咁呢????我地幾個喺巴士笑
湯美無睇post,但我地又有無主動提佢呢?有無地方需要反省呢?所以學習係永無止境...經驗,係無時無刻都會累積...!!!
下山喇...!雖然無上山咁辛苦,但對我嚟講,心理上嘅壓力,絕對唔容易應付!!我行山有兩大弱點:一是體能,上山時已叫晒救命...;二是落斜恐懼症...今次落山時,有d路真係非常非常斜(只係對我嚟講,其他人又無事 :cry: ),我要踎低先落到...其實諗番起都幾樣衰,完成二級山,落山都仲要咁狼狽...呢個時候,隊友
森苗不斷鼓勵我,又加少少鞭策,唔俾我坐住落...終於,試吓又企高d...試吓又企高d,都算有d改善啦!但途中跣咗幾嘢,都幾驚!落落吓,終於落到底喇!!呼~~鬆一口氣!!多謝你,
森苗!!!
返到基地,休息吓,
湯美就因事撤退了,剩番其他人,一邊分享,一邊食午餐,好開心呢!
下晝,我地去咗個小斜坡感受吓沿繩下降,個斜坡有成80度,好直吓,我出去一刻,個心真係有"離一離"嘅感覺,同之前唔同,今次比之前高好多,大家可以睇相感受吓啦!我諗試多幾次,一定對克服畏高好有幫助!
總括嚟講,成日嘅活動係非常之辛苦,但又做咗好多之前無做過嘅嘢,感覺到自己確實有d提升,好似升咗Lv咁,好開心呢!哈哈!!!!起碼,我感覺到自己嘅兩大弱點,都有突破咗極限啦!多謝晒咁多位教練同隊友!!
後記:我當日出發前懶醒,以為自己大汗,帶條吸水毛巾去就無死,點知,條吸水毛巾真係吸水力強,用嚟抺面,真係滴水不漏...搞到塊面乾到爆!!!加上咁曬嘅天氣...我塊面...燶咗!!!唉... :cry:
最後,分享多幾個字關於今次outing:十級嘅辛苦,十級嘅回報!!!